صلاة فتاة الي يسوع

صباح الخير يارب
يارب انا في كلام كتير جوايا مكتوم ومش عارف اعبر عنه
انت اكيد حاسس بيا وباللي جوايا
ساعات كتيرة بروح الكنيسة واقف قدام صورتك اصلي واقيد شمعه
واقول كل اللي جوايا
وبعد مامشي مش بحس بأي تغيير
نفس المشاكل هي هي ونفس الحياة الصعبة هي هي
يارب فيه عريس متقدملي وانا مش مقتنعه بيه اوي
مش عارف اوافق عليه وخلاص ولا ارفضه
طيب لو رفضته يارب هتبعتلي اللي هيناسبني ولا هرجع واندم واقول يارتني قبلته

ياااااارب عاوز اشتغل ومش لاقي شغل
يرضيك يارب اخلص كليتي واخد شهاده علشان اقعد في البيت
يارب نفسي اصحي بدري ويقلولي رايحه فين اقولهم رايحه الشغل
جايه منين جايه من الشغل
وارجع معيطه واقول مديري ضايقني
نفسي احس الاحساس بتاع المدير اللي بيخنق الموظفين ده

عايز يارب احس بحياة جديده بقي تعبت وزهقت من قعدة البيت
بقت عامله زي اداة من ادوات المطبخ
مش بطلع من البيت

عايز اصارحك بحاجه تانيه يارب
زملتي هتتخطب قريب من واحد بتحبه
انا فرحانلها يارب صدقني وبتمنالها السعاده ولكن معلش انا غيرانه منها
ايوه يارب غيرانه مانا انسانه انا كمان ونفسي احب واتحب

يارب مش عارفه بقي اعمل ايه
كل جمعه باجيلك اقيد شمعه قدام صورتك واقولك نفس الكلام

عايزة احب واتحب عايزة اخطب عايزة اشتغل
عايزة حاجات كتيرة يارب

ده حتي مفيش رحله الكنيسة بتطلعها الا لما اكون معاهم
بقول اروح اصلي في اديرة كتيرة عن كل اللي مضايقني وتاعبني

اقولك علي كلمة سر يارب ؟؟
في فرح صاحبتي انتيمتي .. انتمتي يعني صاحبتي يارب
معلش بقي انت عارف لغة الشباب اليومين دول

في فرحها اشتريت فستان حلو اوي اوي ولبسته ورحت الكوافير وصدقني من الغالي مش من الرخيص
حتي ماما قالتلي يابنتي ده انتي في فرح اختك مش عملتي كده
بس انا يارب كنت في فرح اختي كنت صغيره ومش مهتميه بموضوع الجواز ده
بس دلوقتي كبرت ونفسي ارتبط بواحد يحبني ويخاف عليا

المهم يارب نكمل الكلام
رحت الكنيسة وفضلت واقفه معاها ومسكالها الشمعه
ان حد يعبرني ويبص عليا ابدا

رحت وقفت جمب ماما علشان اي ام تيجي تتكلم معاها وتقولها بنتك حلوة عاوزاها لأبني
ان حد يجي يكلم ماما ابدا
مفيش غير واحد بس جه من بعيد
ولما جه علينا قالنا
هي عربيتكم اللي راكنه بره صف تاني دي ؟؟ ياريت تشيلوها عشان عايز اخرج

دي ماما ساعات لما بتتغاظ مني تقولي كاتك خيبه صحابك كلهم اتخطبوا الا انتي
اعمل ايه يعني يارب اروح اجيب الواد من رقبته واقوله اخطبني

يارب بقي اتصرف انت

يارب صدقني انا مش وحشة وبيجيلي عرسان بس مش مناسبين
خايفه ارفضهم اندم
وخايفه اقبلهم واقابل بعد كده في حياتي حد حلو ومناسب عنه
ده حتي الولد اللي معجبه بيه مش عاوز يتلحلح ويصارحني بأي حاجه

دبرني يارب وقولي اعمل ايه
انا طولت عليك معلش ..
علي فكرة انا بحبك اوي